Raid nauwi sa engkuwentro: 4 todas
MANILA, Philippines — Tatlong miyembro ng lawless elements ang napaslang habang nagbuwis din ng buhay ang isa sa dalawang asset ng tropa ng pamahalaan sa isinagawang pagsalakay na nauwi sa engkuwentro sa Brgy. Sumbakil, Polomolok, South Cotabato, ayon sa report ng militar kahapon.
Sinabi ni Lt. Col. Alaric Avelino delos Santos, spokesman ng AFP Western Mindanao (AFP-Westmincom), naganap ang sagupaan nang salubungin ng mga suspek ng putok ang raiding team ng 5th Special Forces Battalion at Polomolok Municipal Police kamakalawa ng hapon habang isinisilbi nila ang warrant of arrest sa kasong murder laban sa wanted na si Tho Catucan ng Purok 1, Brgy. Sumbakil, Polomolok.
Si Catucan na wanted sa mga kasong murder at paglabag sa Comprehensive Dangerous Drugs Act ay miyembro rin umano ng ISIS inspired terrorist group na “Soccksargen Khatiba”.
Nasapol umano ng bala si Catucan at dalawang kasama na kinilalang sina Jer Maguisilan ng Brgy. Sumbakil at Rabino Kutin, 29, ng Brgy. Datal Bob, T’boli, South Cotabato kaya isinugod sila sa Polomolok Municipal Hospital pero pawang idineklarang dead-on-arrival.
Minalas ding tamaan ng bala sa bakbakan ang dalawang asset ng militar na ikinasawi ng isa habang nilalapatan ng lunas ang kasama..
Narekober sa lugar ang isang cal. 45 pistol at isang 9mm Uzi sub-machine pistol.
- Latest