TRO vs suspensyon ng Olongapo mayor inilabas

OLONGAPO CITY, Philippines — Napigilan pansamantala ang paghahain ng suspension order ng Department of Interior and Local Government (DILG) laban kay Olongapo City Mayor Rolen Paulino makaraang maglabas ng temporary restraining order (TRO) ang Quezon City Regional Trial Court.

Sa 1-pahinang resolusyon na pinirmahan ni QC RTC-Branch 83 Judge Ralph Lee, inatasan nito ang DILG, partikular si Atty. Christopher Tiu na ihinto muna ang paghahain ng suspensyon sa loob ng labing limang araw para mabigyan ng pagkakataon na makapagpaliwanag ang kampo ni Paulino sa kanilang argumento.

Si Mayor Paulino kasama ang bise alkalde nito na si Jhong Cortez at anim na konsehal ng lungsod ang hinatulan ng Office of the Ombudsman at inatasang bumaba sa puwesto dahil sa kuwestyonableng transaksyon sa pagitan ng SM Prime Holdings para sa pagpapatayo ng malaking mall nito sa lungsod.

Mismong si dating Olongapo City Mayor at ngayo’y Senador Richard Gordon at Rodalyn Haniff, staff ng dating mayor din at kapatid ng senador na si James Gordon ang naghain ng graft and corruption sa Ombudsman.