3 utol na paslit, ginilitan ni kuya
MANILA, Philippines — Tatlong magkakapatid na paslit ang nasawi matapos na ginilitan sa leeg ng kanilang mismong nakakatandang kapatid na lalaki na nagwala dahil lamang sa walang nakahaing pagkain sa Sitio Capanoyan, Brgy. Marcelo, Calatrava sa lalawigan ng Negros Occidental, Sabado ng hapon.
Kinilala ang mga nasawing magkakapatid na sina Gregor, 1-anyos; Alejandro, 5; at June Renz Melibo, 14, ng nasabing barangay.
Ayon sa isa pang kapatid ng mga biktima na isang 9-anyos na babae na nakatakas sa insidente, ginilitan ng kanilang kuya na si John Mark, 21-anyos ang kanyang mga utol dakong ala-1 ng hapon gamit ang isang kutsilyo habang wala sa kanilang bahay ang kanilang mga magulang.
Nabatid na naliligo sa ilog ang ama ng mga biktima at ang kanilang ina ay nagtatrabaho sa Metro Manila nang maganap ang krimen.
Ayon sa mga imbestigador, galing sa bukid ang suspek at nagalit sa mga kapatid nang madatnan na hindi nakapaghahanda ng kanilang pagkain. Dahil dito, nagwala ang suspek at isa-isa niyang hiniwa ang leeg ng mga kapatid habang nakatakas ang isa.
Patuloy na tinutugis ng mga pulis ang tumakas na suspek matapos ang karumal-dumal na krimen.
- Latest
