Mag-ina inatado ng sundalo

LEGAZPI CITY, Albay, Philippines – Nasa malubhang kalagayan ang mag-ina matapos pagsasaksakin ng 27-anyos na sundalong nagka-war shock kung saan nag-amok kahapon ng umaga sa Barangay Marifosque, bayan ng Pilar, Sorsogon. Naisugod sa Donsol District Hospital ang mag-inang Grace Manzanero at Wyn Gian Manzanero, 5, habang arestado naman ang suspek na si Pfc. Joel Magdalena, 27, ng Barangay Caroyroyan sa bayan ng Pili, Camarines Sur at nakatalaga sa 9th Infantry Division ng Phil. Army sa bayan ng Aroroy, Masbate. Bandang alas-6:30 ng umaga nang mag-amok ang suspek kung saan hinahamon ng away ang mga residenteng makasalubong hanggang sa pumasok ito sa bahay ng mag-ina saka isinagawa ang pananaksak. Pinagtulungan naman arestuhin ng mga barangay tanod at pulisya ang nagwawalang suspek matapos masaksak ang mag-ina.