12-anyos tinamaan ng ligaw na bala

TUGUEGARAO CITY, Cagayan, Philippines – Sugatan ang 12-anyos na binatilyo matapos itong tamaan ng ligaw na bala sa kanyang likuran sa Barangay Inga, bayan ng Enrile, Cagayan noong bisperas ng Bagong Taon. Sa police report na isinumite kay P/Senior Insp. Felicito Dulin, hepe ng Enrile PNP, inakala lamang ng biktimang si James Manicad na may bumato lamang sa kanyang likuran kasabay ng alingawngaw ng putok ng baril. Napag-alamang nakaupo sa labas ng simbahan si Manicad kasama ang dalawa pang kaibigan habang nagmimisa ang pari nang maganap ang insidente. Nakakuha ng bahagi ng slug ng cal. 45 pistol ang mga doktor ng Cagayan Valley Medical Center habang patuloy naman ang imbestigasyon sa pagkakakilanlan ng suspek na nagpaputok ng baril.