25-katao nalason sa formalin
Umaabot sa 25-katao ang iniulat na na-ospital makaraang malason sa kinaing isda na kontaminado ng formalin sa bayan ng Cataingan, Masbate noong Martes.
Sa ulat ni P/Senior Supt. Reuben Theodore Sindac, Masbate police director na isinumite sa Camp Crame, lumilitaw na nagbilihan ang mga resi dente ng mga isdang rumpe (malasogue) at tanigue na inangkat pa ng mga mangingisda mula sa Samar saka ibinenta sa palengke ng Brgy. Poblacion ng nasabing bayan.
Gayon pa man, tatlong oras matapos na kumain ng isda ay nakaranas ng matinding pananakit ng tiyan, pagkahilo, at pagsusuka ang mga biktima kaya mabilis na isinugod sa Cataingan District Hospital.
Base sa pakikipag-ugnayan ng pulisya sa mga doctor, posibleng kontaminado ng formalin ang mga isda kaya nalason ang mga biktima.
Samantala, kumuha na rin ng sample ng mga isda ang mga health officials upang isailalim sa laboratory test.
Kaugnay nito, nagpadala na rin ng mga medical kit at tulong si Gobernador Olga Kho para sa mga nalasong residente.
- Latest
- Trending