WFH at carpooling itinutulak sa Senado

MANILA, Philippines — Iminungkahi ni Senator Erwin Tulfo ang muling pagpapatupad ng work-from-home (WFH) setup at ride-sharing schemes upang matulungan ang mga manggagawa na makatipid sa gitna ng patuloy na pagtaas ng presyo ng petrolyo sa bansa.

“Kung hindi naman kailangan ang pisikal na presensya o aktibidad ng manggagawa sa trabaho, bakit di na lang magreport online?.Halimbawa ang mga nasa opisina sa planning, research, admin, customer service at iba pang kahalintulad na trabaho ay pwede na mag-work from home”, wika ni Tulfo.

Nagawa naman ito noong pandemic at epektibo naman maging ang pagtuturo sa mga mag-aaral noong panahon ng covid ay online.

“Kung kailangan ang presensya sa trabaho tulad sa manufacturing, hotel at restaurant, o sa ospital pwedeng isang sasakyan na lang ang mga magkakatrabaho at hati-hati na lang sa gas”, dagdag pa ni Tulfo.

Maaari rin umanong mag-book ang mga magkaka-opisina sa ride hailing app at hati-hati na lang sa pamasahe.

“With these steps that we have tried before makakatipid ang mga manggagawa” anang mambabatas.