Paglipat ng P13 bilyong pondo para sa 4Ps ikinumpara sa pagnanakaw sa mahirap – solon

MANILA, Philippines — Isang pagnanakaw sa mahihirap ang naging desisyon ni Sen. Imee Marcos na ilipat ang P13 bilyong pondo para sa Pantawid Pamilyang Pilipino Program (4Ps) noong 2023.

Ganito ang pagkukumpara ni Deputy Speaker at Quezon Province Rep. David “Jayjay” Suarez sa briefing ng House Committees on Public Accounts at  Social Services kaugnay ng privilege speech ni 4Ps Partylist Rep. JC Abalos matapos kumpirmahin ni DSWD Sec. Rex Gatcha­lian ang naging realignment ng pondo ng 4Ps noong 2023.

“Lumabas ‘yung House version natin, maintained intact ‘yung pera ng 4Ps.

Now I don’t know what happened in the Senate, why all of a sudden P13 billion was slashed. At dahil sa P13 billion natanggal, mayroong 843,000 Filipino families, which is around 4 million poor Filipinos, ang hindi nakatanggap dahil sa budget cut,” ani ni Suarez.

“Ayun ang malungkot. Ngayon hindi ko alam kung paano natin ilalarawan ang isang sitwasyon na ninakawan natin ang isang mahirap. Kasi kalimitan, ang mga mayaman ang ninanakawan. Kaso lang hindi dapat ninanakawan ang mahihirap. Kasi wala na nga silang pera.”

Sinabi ni Gatchalian na ang 4Ps ay hindi lamang isang programa ng ahensya kundi nakabatay ito sa isang batas—ang 4Ps law.

“Kumbaga, unti-un­ti po natin silang ina­akyat. Tapos mabutasan ka na ng ilang buwan, babalik na naman sa stage 1 yun,” pahayag ni Suarez.