LPG, instant noodles, tubig tinulak sa Price Act
MANILA, Philippines — Isinusulong ng isang kongresista ang pag-amyenda sa Republic Act No. 7581 o ang Price Act upang isama ang liquefied petroleum gas (LPG), instant noodles, potable water sa container at kerosene sa mga produktong isailalim sa regular monitoring ng Price Coordinating Council (PCC).
Ayon kay Bicol Saro party-list Rep. Brian Raymund Yamsuan na naghain ng House Bill No. 7977, nais niyang amyendahan ang RA 7581 upang isama ang mga nabanggit na produkto at maprotektahan ang mga konsyumer mula sa hindi makatarungang taas-presyo partikular sa panahon ng kalamidad.
Ang LPG, instant noodles at tubig ay ilan lamang sa mga pangunahing pangangailangan ngayon ng bawat Filipino.
“The Price Act is due for an update. The Act has not included ‘new’ goods that by virtue of their mass and necessary usage, qualify as basic necessities,” ani Yamsuan.
Giit ni Yamsuan, panahon na para i-update ang Price Act para isama ang mga produktong maraming gumagamit o kumakain.
Ipinasa ang Price Act noong 1992 at nakasaad din sa batas ang pagbabawal na itaas ang presyo ng mga produktong nabanggit sa mga lugar kung saan may kalamidad at nasa ilalim ng state of calamity.
Sa naturang panukala, bibigyan ng kapangyarihan ang Price Coordinating Council (PCC) na magdagdag o mag-alis ng mga produkto sa listahan. Ang PCC ay pinamumunuan ng kalihim ng Department of Trade and Industry.
- Latest
