PGH, Lung Center humihingi ng dagdag na healthcare workers
MANILA, Philippines — Dahil sa pagtaas ng bilang ng mga pasyenteng may COVID-19 bunsod na rin sa pagtataas ng kanilang kapasidad ay humihingi na ng dagdag na healthcare workers (HCWs) ang Philippine General Hospital at Lung Center of the Philippines (LCP) sa Department of Health (DOH).
Sinabi ni PGH spokesperson Dr. Jonas Del Rosario na nasa 30-40 HCWs ang hiling nila sa DOH.
Ito ay makaraang magdagdag na sila ng bilang ng COVID-19 beds na aabot na sa 225 kasama na ang kanilang emergency room. Nasa 190 na rin ang COVID patients na nakaratay sa pagamutan.
Iginiit niya na maaaring magdulot sa pagbagsak ng operasyon ang limitadong bilang ng HCWs dahil sa maaaring magkasakit pa dahil sa sobrang pagod ang mga naka-duty nilang tauhan ngayon.
Humingi naman ng dagdag na 30 pang nurses sa DOH noon pang nakaraang linggo ang LCP.
Ayon kay LCP spokesperson Dr. Norberto Francisco, posibleng ganito rin ang sitwasyon ngayon ng iba pang mga pagamutan sa Metro Manila.
- Latest
