Ambush: Vice Mayor, 2 pa todas
MANILA, Philippines — Nasawi ang vice mayor ng Baliguian, Zamboanga del Norte at dalawang kasamahan nito habang sugatan ang isa pa nang ratratin ng mga di kilalang salarin ang kanilang sinasakyang SUV sa Brgy. Sta. Maria, Siocon, Zamboanga del Norte, kahapon ng tanghali.
Dead-on-arrival sa Siocon District Hospital si Vice Mayor Gani Esmali habang kapwa nasawi noon din ang dalawang kasama nito na sina Police Corporal Godelito Bongcac at Jaymalin Jalabi Tunggal.
Isa pang kasama nila ang sugatan naman at nilalapatan na ng lunas sa nasabing pagamutan si Abduladjid Ibno Bairula.
Batay sa ulat ng pulisya, dakong alas-11:30 ng tanghali nang maganap ang krimen sa Brgy. Sta. Maria, Siocon.
Sakay umano ang mga biktima ng kulay gray na Isuzu Mux na pagmamay-ari ng bise alkalde at patungo sana sa Siocon nang tambangan sila at pagbabarilin ng mga di kilalang salarin, na di pa batid ang bilang at pagkakakilanlan.
Nang maisagawa ang krimen ay mabilis na tumakas ang mga suspek sakay ng isang kulay dirty white na van na walang plaka patungo sa munisipalidad ng Gutalac, Zamboanga del Norte.
Nagsagawa naman kaagad ng dragnet operation ang mga awtoridad laban sa mga suspek, ngunit wala pang kumpirmasyon kung naaresto ang mga ito.
Masusi na ring iniimbestigahan ng mga awtoridad ang krimen upang matukoy ang motibo at sinu-sino ang mga taong nasa likod nito.
- Latest
