Pag-hostage ng bangkay may P1 milyong multa
MANILA, Philippines — Isang panukalang batas ang umusad na sa Senado na naglalayong pagmultahin ng P1 milyon at ikulong ng hanggang 6 na taon ang mga administrador ng mga ospital na magho-hostage ng bangkay ng mga pasyenteng hindi mabayaran ng pamilya ang hospital bill.
Kaparehong parusa rin ang isinusulong para sa mga may-ari ng ospital na tatangging magpalabas ng mga pasyenteng magaling na pero nagkabaon-baon sa utang sa ospital.
Layunin ng panukalang batas ni Senator Risa Hontiveros na palakasin pa ang anti-hospital detention law na dininig naman ng Senate Committee on Health and Demography, na pinamumunuan ni Senator Christopher Lawrence “Bong” Go.
Idinagdag din ni Hontiveros na ang mga ospital ay dapat nanggagamot at hindi nagkukulong ng mga tao at kapag naging ganap na batas, magkakaroon ng Anti-Hospital Detention Fund upang matulungan sa pagbabayad ang mga mahihirap na pasyente.
- Latest