Buntis inatado ng selosong lover

MANILA, Philippines – Limang saksak sa tiyan ang tinamo ng isang 22-anyos na ginang na 6 buwang buntis mula sa kanyang selosong live-in partner na naganap kamakalawa sa Caloocan City.

Nasawi noon din ang biktimang si Cherry Ann Cornelio, ng #651 BMBA Compound, Brgy. 120, ng naturang lungsod, habang nasugatan sa kanang kamay ang anak nitong 2-anyos na babae.

Nadakip ang suspek na si Zaldy Onganion, 33, jobless, at naninirahan din sa naturang lugar.

Batay sa ulat, dakong alas-12:00 ng tanghali noong Linggo nang mag-away sina Cornelio at Onganion nang akusahan ng huli na ang una ay nakikipagrelasyon sa ibang lalaki gayung ito ay buntis na.

Kumuha ng patalim ang suspek at paulit-ulit na pinagsasaksak ang biktima  habang nadamay din ang anak na babae na katabi ng kanyang ina. Nasaksihan naman ito ng 4-taong gulang na anak na lalaki ni Cornelio na siyang nagsumbong sa kanyang lolo na si Barangay Ex-O Rodolfo Cornelio kaya’t naaresto agad ito.

Nadala pa sa Tondo General Hospital si Cornelio ngunit nalagutan ng hininga dakong ala-1:30 ng hapon gayundin ang sanggol sa kanyang sinapupunan.