Hindi natinag sa ‘TSONA’ ni Binay... LP ‘show of force’ kay Roxas
MANILA, Philippines – Ipinakita ng mga miyembro ng Liberal Party ang kanilang puwersa para sa kandidatura ni outgoing DILG Secretary Mar Roxas, isang araw matapos ilahad ni Vice Presidente Jejomar Binay ang kanyang True State of the Nation Address o TSONA.
Nasa mahigit 1,000 lokal na opisyal na miyembro ng LP ang dumalo sa pagtitipon ng partido kahapon sa San Juan para sa kandidatura ni Roxas.
Tila pagpapakita ng puwersa ang naging pagtitipon na dinaluhan ng mga matataas na opisyal tulad ni Senate President Frank Drilon at mga LP mayors sa Metro Manila at daan-daan pang mga gobernador at alkalde mula sa iba’t-ibang lugar sa bansa at isa dito ay si Gov. Bombit Adiong ng Lanao del Sur na sinabing “ARMM is for Mar Roxas,”
Kasama rin sa pagpupulong sina Congresswoman Leni Robredo at Batangas Governor Vilma Santos na sinasabing parehong napipisil na maging running mate ni Roxas.
Ipinakita kahapon ni Pangulong Aquino ang todo-todong suporta kay Roxas matapos surpresang dumalo ito sa pagtitipon para ipakita ang 100 percent nitong suporta sa manok ng administrasyon na kanyang inendorso kamakailan lang. Wala sa official schedule ni Pangulong Aquino ang pagdalo sa nasabing event.
Hinimok ng Pangulo ang mga kapwa miyembro ng LP na sama-samang suportahan si Roxas para hindi masayang ang mga nasimulan na sa Tuwid na Daan.
Inihayag ni Pangulong Benigno Aquino III sa mga local government unit executives, miyembro ng LP at mga mambabatas na puwede na siyang magretiro dahil nakikita niyang nasa magandang kamay naman ang bansa sa hinaharap matapos niyang inendorso si DILG Sec. Mar Roxas bilang manok ng administrasyon sa 2016 elections.
Nagpasalamat din si P-Noy sa mga dumalo sa pagtitipon upang ipakita ang suporta kay Roxas, dahil ito din ang mga taong kasama niya sa pagsisimula ng tuwid na daan ng tumakbo siyang pangulo noong 2010.
Pinatutsadahan din ni P-Noy na hindi pinapangalanan sina Vice President Jejomar Binay at Sen. Grace Poe sa kanyang speech.
Inisa-isa din ng Pangulo ang mga nagawa ng kanyang administrasyon sa loob ng 5 taon na nakinabang ang sambayanang Filipino at hindi lamang ito pangako kundi katotohanan na tila patama kay Binay.
Inilarawang may nangunguna sa survey pero hindi pa naman daw ‘hinog’ na halos patungkol kay Poe habang ang iba naman ay walang inilalatag na solusyon kundi puro batikos lang na patama naman kay Binay.
Magugunita na binatikos ni Binay sa kanyang TSONA ang administrasyong Aquino na inulit lang ang mga dati ng ibinatong akusasyon na manhid at palpak.
- Latest
