Estudyante nakuryente tigok

MANILA, Philippines - Dahil sa sobrang adbenturero, nakuryente at namatay ang isang 15-anyos na binatilyo nang aksidente nitong mahawakan ang “live wire’ ng poste sa paanan ng tulay sa Las Nieves, Agusan del Norte kamakalawa.

Ang  biktimang si John Lowie Rosales, Grade VI pupil sa Mat-I Elementary School at residente ng Purok 3, Brgy. Pinanaan, Las Nieves ng lalawigang ito ay idineklarang dead on the spot dahil sa lakas ng boltahe ng kuryente na pumasok sa katawan nito.

Sa ulat, sinabi ni Supt-Romaldo Bayting, Spokesman ng Police Regional Office (PRO) 13, naganap ang insidente pasado alas -12 ng tanghali sa paanan ng tulay ng Purok 4, Brgy. Pinanaan ng bayang ito, kung saan papauwi na umano ang biktima ng madaanan nito ang ‘live wire’  na nakabit sa poste ng kuryente  at saka kinalikot.

Kasalukuyan na ngayong nakaburol ang bangkay ng biktima sa kanilang tahanan kaugnay ng paghahatid dito sa kaniyang huling hantungan.