PNoy, tiniyak na may mananagot sa PDAF scam
MANILA, Philippines - Tiniyak ng Pangulong Benigno Aquino III sa taumbayan na may makakasuhan at mananagot sa pork barrel scam kaya nais nilang magkaroon ng matibay na ebidensiya bago isampa ang kaso sa mga nasasangkot sa anomalya.
Ayon kay Deputy Presidential Spokesman Abigail Valte, matibay ang paninindigan ng administrasyong Aquino na kailangang magkaroon ng hustisya dahil sa hindi tamang paggamit ng pondo ng bayan partikular ang Priority Development Assistance Fund (PDAF) ng mga mambabatas na nauwi lamang umano sa mga pekeng NGO’s ni Janet Lim-Napoles.
Wika pa ni Usec. Valte, ang utos ni Pangulong Aquino sa Department of Justice (DOJ) ay dapat may matibay na ebidensiya bago isampa ang kaso sa isang indibidwal upang tumayo ang kaso at magkaroon ng conviction.
Aniya, walang ibinigay na timeline si Pangulong Aquino sa probe team sa pork barrel pero iginiit nitong dapat maging prayoridad ang nasabing kaso.
Magugunita na sumuko mismo sa Pangulo si Napoles at ngayon ay nakakulong sa Fort Sto. Domingo sa Sta. Rosa, Laguna.
Ginawa ng Malacañang ang paniniguro sa gitna ng nakatakdang mga protesta ng mamamayan laban sa pork barrel na nabunyag na nauwi lamang sa pekeng NGO’s ni Napoles.
- Latest