MANILA, Philippines — Magpupuwestuhan sa playoffs ang apat na koponan sa krusyal na double-header papasok sa huling bahagi ng 2024 PBA Philippine Cup elimination round sa Philsports Arena sa Pasig City.
Magduduwelo ang Magnolia at Terrafirma ngayong alas-4:30 ng hapon bago ang sagupaang NLEX at Rain or Shine sa alas-7:30 ng gabi.
Tabla ang Hotshots at Road Warriors sa 5-4 kartada at may pag-asa pa sa Top 2 sahog ang ‘twice-to-beat’ advantage, habang tengga rin sa parehong 5-5 marka ang Dyip at Elasto Painters.
Sinumang lulusot sa krusyal na banggaan ay makakasiguro ng puwesto sa quarterfinals kung saan San Miguel (10-0) at Barangay Ginebra (7-3) pa lang ang nakakapasok.
Inaasahang babalik na sa Road Warriors si Robert Bolic matapos hindi makalaro sa 120-103 kabiguan nila sa Beermen dahil sa panganganak ng kanyang asawa.
Maging ang katapat nilang Elasto Painters ay galing din sa talo na pumutol sa kanilang five-game winnings streak matapos tumaob sa Hotshots, 102-108, sa Tiaong, Quezon.
Mula noon ay nakalasap ng dalawang sunod na kabiguan ang Magnolia kontra sa San Miguel, 91-98, at Meralco, 51-74, na siyang kanilang franchise-lowest points upang manganib sa playoffs.
Wagi naman ang Terrafirma sa kanilang huling laban sa NorthPort, 110-108, kaya nasa momentum laban sa Magnolia.
Wala pa ring kasiguruhan ang TNT Tropang Giga at Meralco na may 5-5 kartada at pasok sa Top 8.