National boxing team sasalang sa US at Thailand camps
MANILA, Philippines — Desidido ang Association of Boxing Alliances in the Philippines (ABAP) sa tangkang makasikwat ng gintong medalya sa Paris Olympics sa Hulyo.
Ipadadala nito ang national boxing team sa dalawang training camps para paghandaan ang ikalawang Olympic qualifying at Paris Olympics.
Magtutungo ang national team sa Denver, Colorado para sumailalim sa pukpukang ensayo sa US Olympic Training Center — ang venue kung saan nagsasanay ang mga boksingerong lalahok sa Paris Olympics.
Magandang pagkakataon ito para sa Pinoy pugs upang mahasa nang husto bago magpartisipa sa Olympic qualifying na idaraos sa Bangkok, Thailand sa Abril.
Matapos ang training camp sa Colorado ay tutulak ang mga Pinoy boxers sa Bangkok para doon ipagpatuloy ang paghahanda para sa Olympic qualifiers.
Hahataw sa Olympic qualifying ang iba pang miyembro ng national team kabilang na si Tokyo Olympics silver medalist Carlo Paalam na bigong makapasok sa Paris Games matapos magtamo ng injury sa unang Olympic qualifiers na ginanap sa Italy.
Tanging sina Tokyo Olympics bronze medalist Eumir Marcial, Tokyo Olympics silver medalist Nesthy Petecio at Aira Villegas pa lamang ang nakasiguro ng silya sa Paris Olympics.
Nakapasok si Marcial sa Paris Games dahil sa kanyang silver-medal finish sa 19th Asian Games sa Hangzhou.
- Latest
