Creamline babalik agad sa porma vs Capital1
MANILA, Philippines — Ang pagbangon mula sa unang kabiguan ang gagawin ng nagdedepensang Creamline sa pagsagupa sa Capital1 Solar Energy sa 2024 PVL All-Filipino Conference sa Smart Araneta Coliseum.
Lalabanan ng Cool Smashers ang Solar Spikers ngayong alas-4 ng hapon kasunod ang salpukan ng mainit na Petro Gazz Angels at Chery Tiggo Crossovers sa alas-6 ng gabi.
May magkakatulad na 4-1 record ang Creamline, Cignal HD, PLDT Home Fibr, Petro Gazz at Choco Mucho para magsosyo sa liderato sa itaas ng Chery Tiggo (3-2), Akari (2-3), Farm Fresh (2-3), Capital1 (1-4), Nxled (1-4), Galeries Tower (1-4) at Strong Group Athletics (0-5).
Nagtapos ang 19-game winning streak ng Cool Smashers simula noong 2019 sa Reinforced Conference dahil sa pagkatalo sa Crossovers.
“I think maganda rin ito at least kahit papaano early in the season, and I would say dami rin naming natutunan kahit ganoon,” ani Alyssa Valdez. “So we’re really gonna go back and practice.”
Bukod kay Valdez, muli ring sasandigan ng Creamline sina Tots Carlos, Jema Galanza, Michele Gumabao, Bernadeth Pons at Bea De Leon kontra kina Janeca Lana, Patty Orendain, Heather Guino-o, Sydney Niegos at Jorelle Singh ng Capital1.
Bigo ang Solar Spikers na maitala ang back-to-back wins matapos ang 25-17, 20-25, 25-20, 19-25, 10-15 pagyukod sa Highrisers sa kanilang huling laro.
- Latest
