Jasmine Mojdeh sumisid ng ginto sa Beijing
MANILA, Philippines — Nagpasiklab si Brent International School Manila standout Micaela Jasmine Mojdeh nang sumisid ito ng isang ginto, isang pilak at isang tansong medalya sa 2024 Asia Pacific Activities Conference (APAC) Swimming Championships na ginanap sa International School of Beijing swimming pool sa Beijing, China.
Inilabas ni Mojdeh ang water beast mode nito para mamayagpag sa girls’ 100m butterfly sa bendisyon ng isang minuto at 3.33 segundo.
Inilampaso ng World Junior Championships semifinalist sina Gabrielle Sung ng China na nagkasya sa pilak tangan ang malayong 1:05.41 at Adison Chow ng Hong Kong na nakasiguro ng tanso bitbit ang 1:06.02.
“We are proud of her amazing achievements. I am so grateful to the entire Brent Aqualions Swim Team for these kind efforts of cheering for Jas on her last swim in APAC,” ani Joan Mojdeh na team manager ng Behrouz Elite Swimming Team-Philippines.
Bukod sa ginto, umani rin si Mojdeh ng pilak sa 50m butterfly (28.76) at tanso sa 100m Individual Medley (1:07.16).
Nagpasiklab din si Zayden Ramos ng International School Manila na kumana ng dalawang ginto at dalawang tansong medalya sa boys division.
Naghari si Ramos sa 100m butterfly matapos magsumite ng 57.58 segundo habang nagwagi rin ito ng ginto sa 50m butterfly bunsod ng naitala nitong 25.53 segundo.
Umani pa si Ramos ng dalawang tanso sa 50m freestyle (24.45) at 100m freestyle (53.23).
- Latest
