Sotto, Adelaide pinataob ang Brisbane

MANILA, Philippines — Hindi pa rin mapigilan ang nagliliyab na Adelaide 36ers matapos daigin ang Brisbane Bullets, 87-84, para palawigin ang winning streak sa 2022-2023 Australia National Basketball League (NBL).

Sa ikaapat na sunod na starting gig ni Sotto, nasikwat din ng 36ers ang ikaapat na sunod na tagumpay nito sa harap ng rekord na 9,263 fans sa kanilang homecourt sa Adelaide Entertainment Center.

Kumubra ng 5 points, 4 rebounds at 1 tapal sa 11 minutong aksyon ang 7-foot-3 Filipino sensation na unti-unting nasisiguro ang starting center spot para sa Adelaide sa ilalim ni coach CJ Bruton.

Ito ay kahit pa nakatapat niya ang dating NBA player na si Aron Baynes, na nahirapan din tungo sa 10 puntos at 12 rebounds para sa Brisbane.

Dahil dito, umangat na sa ikalimang puwesto ang 36ers hawak ang 10-8 kartada para palakasin ang pag-asang makapasok sa playoffs.

May tsansa pang lalong lumipad sa team standings papasok ng Bagong Taon ang 36ers na nakabuntot lang sa New Zealand Breakers (11-6), South East Melbourne Phoenix (12-8) at Cairns Taipans (10-7).

Solo liderato naman ang reigning champion na Sydney Kings hawak ang 13-5 kartada.