Jazz naungusan ang Clippers

SALT LAKE CITY — Naghulog si guard Donovan Mitchell ng 45 points para pamunuan ang Utah Jazz sa 112-109 pag-eskapo sa Los Angeles Clippers sa Game One ng kanilang Western Conference semifinals series.

Kumamada si Mitchell ng 32 points sa kabuuan ng second half para sa pagbangon ng Jazz mula sa double-digit deficit at kunin ang 1-0 abante sa kanilang best-of-seven showdown ng Clippers.

Nagdagdag sina Most Improved Player at Fil-Am guard Jordan Clarkson at Bojan Bogdanovic ng tig-18 markers para sa Utah.

Pinamunuan ni Kawhi Leonard ang Los Angeles sa kanyang 23 points at kumolekta si Paul George ng 20 points at 11 rebounds kasunod ang 18 markers ni Luke Kennard na nagsalpak ng team-high na apat na three-pointers.

Bumangon ang Jazz mula sa 14-point deficit para kunin ang 103-93 bentahe sa 5:22 minuto ng fourth quarter na naibaba ng Clippers sa 109-112 sa huling minuto.

Sinupalpal ni Utah center Rudy Gobert ang panabla sanang triple ni Los Angeles forward Marcus Morris para selyuhan ang kanilang panalo.

Sa Philadelphia, humakot si Joel Embiid ng playoff-best na 40 points at 13 rebounds para gabayan ang 76ers sa 118-102 pagresbak sa Atlanta Hawks sa Game Two ng kanilang Eastern Conference semis duel.

Nagdagdag si Tobias Harris ng 22 markers at may 21 at 14 points sina Seth Curry at Shake Milton, ayon sa pagkakasunod, para itabla ang Philadelphia sa 1-1 sa kanilang serye ng Atlanta.

Pinamunuan ni Trae Young ang Hawks sa kanyang 21 points habang nag-ambag sina Danilo Gallinari at Kevin Huerter ng 21 at 20 markers, ayon sa pagkakasunod.

Ang jumper ni Milton ang nagbigay sa Philadelphia ng 95-84 abante sa pagsisimula ng fourth period kasunod ang inihulog nilang 14-0 bomba para tuluyan nang iwanan ang Atlanta.