Nationals hindi nakaporma sa Italy

MANILA, Philippines — Bukod sa malalaki ay may matindi pang outside shooting ang mga Ita­lians.

Pinaluhod ng Italy ang Gilas Pilipinas, 108-62, sa pagbubukas ng 2019 FI­BA World Cup kagabi sa Foshan In­ternational Sports and Cultural Center sa China.

Bumandera para sa pa­­nalo ng Italy sina NBA stars Danilo Gallinari at Marco Belinelli.

Kaagad itinayo ng FI­BA No. 13 ranked  team ang 29-point lead, 37-8, sa pagtatapos ng first period hanggang palobohin ito sa halftime, 62-24.

Sa nasabing yugto ay tumipa ang mga Italians ng 11-of-17 shooting sa three-point line kumpara sa  0-of-12 clip ng Natio­nals.

Tumipa si natura­lized center Andray Blatche ng 15 points para sa tro­pa ni na­tio­nal coach Yeng Guiao at may 9 markers naman si five-time PBA MVP June Mar Fa­jardo na karamihan ay mula sa free throw line.

Huling nagharap ang Italy at Pilipinas sa World Cup noong 1978 kung saan nanaig ang mga Ita­lians, 112-75.

Hinawakan ng mga Italians ang 86-39 kalamangan sa pagtiklop ng third quarter patungo sa pagtatala ng 98-48 bentahe mula sa slam dunk ni American-born Jeff Brooks sa huling 3:46 minuto ng final canto.

Nakatakdang labanan ng Gilas Pilipinas ang Serbia, tinalo ang Angola, 105-59, bukas.

Bumandera sina Bogdan Bogda­novic, Nikola Jokic, Ni­kola Milutinov at Boban Mar­janovic pa­ra sa mga Serbians.

“Yes, we have already scouted the team. We know who we’re fron­ting,” ani Serbian coach Sa­sha Djordjevic sa tropa ni mentor Yeng Guiao.

Sa iba pang laro, ti­na­kasan ng Puerto Rico ang paboritong Iran, 83-81, sa Group C; binigo naman ng Poland ang Vene­zuela, 73-57, sa Group A; at pi­­na­tumba ng Russia ang Nigeria, 82-77, sa Group B.