Falcons nilantakan ang Archers
Ateneo Blue Eagles dinagit naman ang Tamaraws
MANILA, Philippines — Matibay na depensa ang naging sandata ng Adamson University para biguin ang De La Salle University, 57-50, habang bumawi ang nagdedepensang Ateneo De Manila University kontra sa Far Eastern University, 82-62, sa Season 81 UAAP men’s basketball tournament sa Araneta Coliseum.
Sa kanilang mahigpit na depensa ay hindi nakaiskor ng field goal ang Green Archers para sa lowest output sa opening period kung saan siyam na puntos lamang ang nagawa ng Falcons para sa 9-2 bentahe.
Umiskor si Justin Baltazar sa unang field goal ng La Salle sa 8:39 minuto sa second period, ngunit tuluy-tuloy na rin ang dominasyon ng Adamson para masungkit ang kanilang unang panalo sa taft-based cagers sa loob ng tatlong taon at bumawi sa kanilang 78-79 overtime loss sa first round noong Oktubre 13.
Sa panalo ng Falcons ay nakasosyo nilang muli sa liderato ang Blue Eagles sa kanilang parehong 7-2 kartada, habang ang Green Archers ay nanatili sa ikatlong puwesto kasama ang Tamaraws sa 5-4 marka.
“We prepared pretty well against La Salle. Everyone was excited to play against them today. I guess what really transpired in this game is our defense. We have showed today that we’re able to control them,” sabi ni coach Franz Pumaren sa kanya ring unang panalo laban sa De La Salle simula noong 2016.
Hindi nagawa ng Green Archers na resolbahin ang depensa ng Falcons kaya umani lamang sila ng mababang 26 percent shooting.
Kagaya sa una nilang pagtatagpo, nagtala si Sean Manganti ng 19 points, 11 rebounds, 4 assists at 2 steals, habang si Papi Sarr ay tumulong ng 12 points, 16 rebounds at 2 assists.
Hindi rin nagpahuli ang Ateneo kahit wala si Thirdy Ravena dahil sa one-game suspension at ang injured na sina Matt at Mike Nieto, nanatili pa ring solido ang opensa at depensa ng tropa ni coach Tab Baldwin upang angkinin ang kanilang pang-pitong panalo sa siyam na laro.
Sa kanilang run-and-gun game ay naitala ng Blue Eagles ang 54-33 abante mula sa triple ni Jolo Mendoza sa 4:21 minuto sa third period patungo sa pagresbak sa kanilang 60-63 pagkatalo sa Tamaraws sa first round.
- Latest