Kumpiyansa si Pacquiao

BRISBANE – Dumating na dito kahapon si Philippine boxing great Manny Pacquiao para sa kanyang title defense laban kay Australian challenger Jeff Horn.

Kumpiyansang idineklara ni Pacquiao na uuwi siya sa Pilipinas na isa pa ring world champion.

Kasama ang malaking grupo sa kanilang biyahe mula sa Maynila, itataya ni Pacquiao ang kanyang suot na World Boxing Organization welterweight title laban kay Horn sa Hulyo 2 sa Suncorp Stadium.

“In all my years of boxing, I have never been as motivated and fired up as this fight,” sabi ni Pacquiao sa mga reporters sa airport.

“My team is very happy with my preparation. I am looking forward to this and I will be going home as world champion,” dagdag pa ng Senador.

Inaasahang tatalunin ni Pacquiao (59-6-2, 38 knockouts) si Horn ngunit hindi pa nakakaiskor ang Filipino great ng knockout victory sapul nang pigilin sa 12th round si Miguel Cotto noong 2009.

Sinabi ng Filipino world eight-division champion na gagamitin niya si Horn para patunayan na hindi pa siya laos sa edad na 38-anyos.

Noong nakaraang taon ay nagretiro si Pacquiao matapos talunin si Timothy Bradley, Jr. noong Abril bago bumalik sa ibabaw ng boxing ring at agawin kay Jessie Vargas ang suot nitong WBO welterweight title noong Nobyembre.

Pipilitin ni Pacquiao na patulugin si Horn (16-0-1, 8 KOs) para muling maitaas ang kanyang pa-ngalan.

Naniniwala naman ang 29-anyos na si Horn, dating physical education teacher sa Brisbane na matatalo niya si Pacquiao at hihirangin bilang bagong WBO welterweight king sa harap ng 50,000 fans na manonood sa Suncorp Stadium.