Pang-No.26 na si Martinez sa world ranking
MANILA, Philippines - Pinaganda ni figure skater Michael Martinez, ang unang Filipino at Southeast Asian na nakalahok sa Winter Olympics, ang kanyang personal best matapos pumang-anim sa ISU 2015 Audi Cup of China kamakailan.
Nagposte si Martinez ng 220.36, ang kanyang pinakamagandang iskor mula nang sumabak sa Winter Olympics sa Sochi, Russia noong nakaraang taon, para pumuwesto sa top 10 sa hanay ng mga high-caliber skaters sa buong mundo.
Ngayon ay may ranggong No. 26 si Martinez.
Dinomina naman ni Spanish star Javier Fernandez ang nasabing kompetisyon sa itinalang 270.55 sa men’s category, habang ang female figure Japanese ice skater na si Mao Asada ay nagtala ng 197.48.
Nagmula sa pagsikwat sa gold medal sa nakaraang ISU 2015 Bangkok Asian Open Figure Skating Trophy tournament, ipinakita ni Martinez ang kanyang husay sa free skating program nang maglista ng personal best na 148.12.
Sa technical elements ay umiskor siya ng 77.50 at nagkaroon ng 71.62 para sa presentation na may deduction na -1.00.
Si Martinez ay ginagabayan nina coaches John Nicks at Peter Kongkasem, habang ang kanyang choreographer ay si Nikolai Morozov.
Sa Pilipinas si Martinez ay iginigiya nina mentors Abraham Domdom at Noel Anthony Nerida.
- Latest
