Money Talks bumandera sa Special Maiden Race
MANILA, Philippines – Nagpakilala ang kabayong Money Talks nang pangunahan ang 2015 PCSO Special Maiden Race 3YO Open noong Sabado sa San Lazaro Leisure Park sa Carmona, Cavite.
Si Reynaldo Niu Jr. ang siyang gumabay sa tatlong taong kabayo sa 1,400-metrong karera at ginulat ng tambalan ang mga paborito nang makapagdomina sa karera.
Ang Mccartney sa pagdiskarte ni Fernando Raquel Jr. ang siyang paborito sa karerang sinalihan ng 11 kabayo dahil ang sinakyan ang siyang nanalo sa PCSO Trial race.
Sa unang yugto ng karera nakaporma ang nasabing kabayo pero nang humataw na ang Money Talks ay nawala ito sa eksena at tumapos lamang sa ikaapat na puwesto.
Naunang nakuntento ang Money Talks sa pang-apat na puwesto sa alisan pero sa far turn ay kinuha ang liderato sa Mccartney.
Humabol ang dating nasa ikatlong puwesto na Diamond’s Best sa pagdiskarte ni Val Dilema pero sapat ang naipundar na halos dalawang dipa ng nangungunang kabayo para makuha ang panalo.
Sinahugan ng nagpakarera na Philippine Charity Sweepstakes Office (PCSO) ng P1 milyong premyo ang stakes race at ang connections ng Money Talks ay nagkamit ng P600,000.00 gantimpala.
Natuwa rin ang mga naniwala sa kakayahan ng nagwaging kabayo dahil tumama sila ng P198.50 dibidendo sa win.
Ang pagsegundo ng Diamond’s Best, ang second choice sa bentahan, ay nagresulta sa magandang P1,835.00 sa 11-9 forecast.
Nagkampeon naman ang Candy Crush sa PSCO Special Handicap Race na pinaglabanan sa 1,400m at suportado pa ng PCSO.
Si Fernando Raquel Jr. ang hinete ng kabayo na nakitaan ng lakas sa pagremate para maisantabi ang pagkakalagay sa pang-limang puwesto sa alisan.
Sa huling 600-metro ay nakapasok ang kabayo sa huling 150 metro ay nasa unahan na bago tuluyang iniwanan ang mga katunggali.
Nakaremate rin ang Unica Champ sa pagdiskarte ni JD Juco para maitulak sa pangatlong puwesto ang naunang lumamang na Power Over na ginabayan ni RC Baldonido.
Nasa P9.00 ang ibinigay sa win, habang ang forecast na 4-3 ay pumalo sa P18.00.
- Latest