Altas, Stags pag-aagawan ang no. 3 slot sa final 4

MANILA, Philippines - Magkakaroon ng ka­ra­nasang makalaro sa play­off ang siyang tini­tingnan ni San Sebastian College coach Topex Robinson na makakatulong sa ko­po­nan papasok sa Final Four ng 89th NCAA men’s basketball  tournament na si­si­mulan sa Nobyembre 7 sa The Arena sa San Juan City.

Haharapin ng Stags ang Perpetual Help Altas sa natatanging laro nga­yong alas-4 ng hapon at ang mananalo ang siyang ku­kuha  sa No. 3 berth sa se­mifinals.

Nangailangan ng extra game ang dalawang kopo­nan matapos magtabla sa 11-7 baraha.

Bagama’t masasabing ‘no-bearing’ na ito para sa Altas at Stags dahil kaila­ngan pa rin ng dalawang koponan na talunin ng da­lawang sunod ang No. 1 San Beda at No. 2 Letran sa Final Four, itinata­nim naman ni Robinson sa isipan ng mga bataan na simula na ng Playoffs upang mas maging handa ka­pag opisyal nang binuksan ang semifinals.

“This is already playoffs basketball for us. We just wanted to enjoy the op­portunity because no­bo­dy expected us to be here in the first place,” wi­ka ni Robinson.

Ang mga baguhang si­na CJ Perez at Jamil Ortuouste ang ilan sa mga ma­ngunguna sa koponan at mahalaga ang makukuhang karanasan dahil mas mahirap ang haharapin sa Final Four.

Sa kabilang banda ay kai­langan din ng Altas na manalo para tumaas ang kumpiyansa matapos wakasan ang laro sa eli­mi­nation round bitbit ang limang sunod na pagka­talo.

Ang San Beda ang na­nguna sa double round elims sa 15-3 baraha, habang ang Letran ang nasa ika­lawang puwesto sa ka­nilang 14-4 karta.

Ngunit nalalagay pa sa alanganin ang puwesto ng three-time defending champion na Red Lions matapos lumabas ang alegasyon na si Ryusei Koga ay naglaro sa ibang liga ha­bang tumatakbo ang NCAA.

Hinihintay ng NCAA ang mga ebidensya at ang pormal na pagsasampa ng reklamo para matalakay ito.