Yulo naka-gold sa Tashkent

MANILA, Philippines — Hindi maawat si Paris Olympics-bound at world champion Caloy Yulo sa paghakot ng gintong medalya sa mga international competitions.

Nadagdagan pa ang ka­ban ni Yulo nang ang­kinin nito ang gintong me­dalya sa men’s indi­vidual all-around sa 2024 Senior Men Artistic Gymnastics Asian Championships na ginaganap sa Tashkent, Uzbekistan.

Naglatag si Yulo ng im­presibong performance sa lahat ng mga apparatus — floor exercise, pommel horse, still rings, vault, parallel bars at horizontal bar — upang makalikom ng kabuuang 84.931 points.

Ito ang unang ginto ni Yulo sa individual all-around sa Asian Championships kung saan nagkasya lamang ito sa pilak sa dalawang magkasunod na edisyon — no­ong 2022 sa Qatar at sa Singapore.

Pinataob ni Yulo si­na Milad Karimi ng Ka­zakhs­tan (84.632) at Abdullah Azimov ng Uzbekistan (82.431).

Madaragdagan pa ang koleksiyon ni Yulo dahil hahataw pa ito sa finals ng floor exercise, pommel horse, still rings, vault, parallel bars, at horizontal bar.

Target ni Yulo na madepensahan ang kanyang ko­rona sa vault, floor exercise at parallel bars na pi­nagharian nito noong 2023 Asian Championships.

Sumikwat si Yulo ng isang ginto sa parallel bars at pilak sa vault sa FIG Artistics Gymnastics World Cup Series Doha Leg na ginanap sa Qatar noong na­karaang buwan.