Suklam (40)

Hindi nga pumasok sa trabaho si Vivian­ at maski si Oscar ay wala rin. Hindi mapakali si Brent. May nangyari nga kaya sa dalawa?

Nang mag-alas tres ng hapon, nilapitan niya ang secretary ni Vivian at kunwari ay may hinahanap na papeles pero ang totoo ay si Vivian ang gusto niyang itanong.

“Darating ba si Vivian, Mara?” tanong niya.

“Naka-leave yata si Mam.’’

“Hanggang kailan?’’

“Hindi ko alam Brent.’’

“Sige di bale na lang. Pagdating na lang ni Vivian saka ko itatanong ang papeles. Salamat, Mara.’’

“Basta ikaw Brent, na­nginginig pa,’’ sabing nakangiti ni Mara.

“Puro ka biro Mara.’’

“Hindi ako nagbibiro, Brent, ha-ha-ha. Maski ting­nan mo ang puso ko.’’

“Makaalis na nga. Gusto mo akong gawing heart surgeon.’’

Nagtawa si Mara.

Gumawi naman siya sa department ni Oscar at kunwari ay nagtanong din ukol kay Oscar.

“Pre wala ba si Oscar?’’ tanong niya sa kasamahan nito.

“Wala, Brent. Leave yata.’’

“Ganun ba? Sige sala­mat.’’

“Sasabihin ko sa kanya na hinahanap mo. Baka bukas pumasok na ‘yun.’’

“Okey lang Pre,’’ sagot ni Brent at umalis na siya. May naglalaro sa isip niya. Baka magkasama sina Vivian at Oscar.

(Itutuloy)