Alupihan (153)
HINDI na pinag-interesang basahin pa ni Cris ang sulat na nasa ilalim ng unan. Kahit pa pinaghihinalaan nila si Diana, inosente pa rin ito kaya hindi siya dapat makialam sa sulat nang may sulat. Ang mahalaga sa kanya ngayon ay hindi naman talaga inabandona ni Diana ang kuwarto at maaaring babalik nga ito. Emergency nga lang siguro kaya ito biglang umuwi.
Isinara ni Cris ang room ni Diana. Hindi siya nag-iwan ng ebidensiya na pumasok siya roon. Nakakahiya kung malalaman nito na pinasok ang room niya nang walang paalam. Nakakapasok lang siya sa room ng boarders kapag lilinisin at humihingi siya nang pahintulot kung lilinisin ito.
Ang iniisip ngayon ni Cris ay kung paano mahuhuli ang sinasabing magnanakaw na kakutsaba umano ni Diana. Sabi ni Hani kahapon, maaaring pinag-aaralan pa ng magnanakaw kung paano makakapasok sa bahay. Inaalam kung saan dadaan at maaaring nahihirapan sa pagpaplano sapagkat ang mga dadaanang bintana ay may iron grills.
Kinagabihan, nang dumating si Hani galing sa trabaho ay inabangan ni Cris. Sinabi rito na umuwi ng probinsiya si Diana. Nagulat si Diana.
“Lumalalim ang misteryo ano Kuya? Bakit kaya biglang umuwi?’’ tanong nito.
“Emergency daw.’’
Nag-isip si Hani.
“Totoo kaya ‘yun, Kuya?’’
“Hindi ko nga alam, Hani.’’
Napabuntunghininga si Hani.
Saka nagsalita.
“Basta maghanda tayo Kuya. Palagay ko may mangyayari.’’
“Sige Hani.’’
KINABUKASAN, maliligo si Hani nang tawagin siya ni Gretchen. Mukhang may sasabihing mahalaga. Kinabahan si Hani. Ayaw na niyang makipag-usap kay Gretchen.
“Sandali lang Hani. Mag-usap tayo.’’
“Tungkol saan, Gretch?’’
“Halika muna sa room ko.’’
(Itutuloy)
- Latest