Alupihan (83)
NAISIP ni Cris na huwag nang alamin pa kung ano ang mga ginagawa nina Gretchen at Diana. Hayaan na niya ang mga ito at huwag na siyang makisangkot pa.
Kahiya-hiya siya kung may makakita at makaalam na naninilip siya sa kuwarto.
Ang tingin pa naman sa kanya ay tahimik at kagalang-galang. Kaya nga lagi siyang paboritong tuksuhin ng mga pilyang boarders. Ang pagkakilala sa kanya ay mabait at walang gagawing kalokohan.
Kung nahuli siya sa akto ni Hani kanina na nakasilip sa room ni Diana, tiyak na basambasa ang papel niya.
Hindi na siya pagtitiwalaan.
Sira na ang kanyang pagkatao.
At ang nasirang pagkatao ay hindi na maibabalik.
Hayaan na lang niya kung ano ang mga ginagawa nina Gretchen at Diana. Bahala sila sa buhay nila. Basta siya, hindi na magpapadala sa utos ng kanyang utak na panoorin ang ginagawang kahalayan. Tama na ang minsan ay nasaksihan niya.
ISANG gabi, mga pasado alas sais, nasa opisina niya si Cris at may ginagawa sa computer nang may marinig siyang mahihinang katok sa pinto.
Tumayo siya at binuksan ang pinto.
Si Hani. May hawak na plastic supot.
“Magandang gabi Kuya. May pasalubong ako sa’yong suman.’’
“Aba sunud-sunod ang pasalubong mo sa akin ah. Hindi pa ako nakakaganti sa una e ito na naman.’’
‘‘Si Kuya naman para kaunting pasalubong lang.’’
‘‘Saan galing ang suman, Hani?’’
“Sa probinsiya Kuya. Pinadala ng nanay ko. Bagong luto ‘yan at napakasarap.’’
“Naku e mahilig ako sa suman. Tamang-tama ito.’’
‘‘Masisiyahan ka diyan Kuya.’’
‘‘Mukha ngang masarap.’’
‘‘Sige Kuya.’’
‘‘Salamat Hani.’’
Paalis na si Hani nang biglang magdaan sina Diana at Gretchen. Nakita ng mga ito na galing si Hani sa opis ni Cris.
(Itutuloy)
- Latest
