Janine ug Paulo nagbuwag?
CEBU, Philippines — Bisan pa man nga wala’y opisyal nga pag-angkon kaniadto kalabot sa ilang relasyon , niulbo karon ang taho nga matud pa nagbuwag na sila si Paulo Avelino ug Janine Gutierrez .
Wala hinoun matino kun unsa ang rason sa maong gidungog nga breakup. Sa nangaging interview , kanunay ra nga ibalik-balik nila ni Janine ug Paulo ang linya nga malipayon ra sila sa usa'g-usa.
Season 1 sa “Batang Quiapo” makita sa Youtube
Isip kabahin sa selebrasyon ng “FPJ’s Batang Quiapo” alang sa unang anibersaryo niini, libre nga makita ang full episodes niini sa season one sa ABS-CBN Entertainment YouTube channel. Gisugdan na usab sa bida niini nga si Coco Martin ang pagbisita sa nagkadaiyang dapit sa Pilipinas aron magpasalamat sa tanang nisuporta sa maong teleserye.
Padayon nga makita ang “FPJ’s Batang Quiapo” sa Kapamilya Online Live sa Pilipinas, Asya, Australia, Europe, ug New Zealand.
International project
Ipasalida sa mga sinehan didto sa Singapore ug Malaysia sugod karong adlawa ang labing una nga pelikula sa Sparkle artist nga si Kimson Tan . Ang maong pelikula kay nag-ulohan og King of Hawkers . Kauban ni Kimson sa maong international project mao ang sikat nga beteranong aktor nga si Hugo Ng, popular nga Singaporean actress nga si Dawn Yeoh, sikat nga aktor sa Hong Kong nga si Moses Cheng, ug ilado nga artista sa Macau nga si Gini Chang .
Busy sa artist center
Ang musical-variety show nga pagabitoonan sa Starkada talents maoy gikabisihan karon ni Eric Quizon. Gihuptan niya ang 34 ka talents sa NET 25. Matud pa niya nga susama kinin og That’s Entertainment kun ubay-ubay gyud ka mga indbidwal ang mahatagan og higayon nga modalit sa ilang mga talento.
DongYan gipasidunggan sa Senado
Giila sa Senado ang kalamposan sa pelikulang Rewind nga gibidahan sa magtiayong Dingdong Dantes ug Marian Rivera . Si Senator Robinhood Padilla ang niumol og resolusyon nga naghatag og pasidungog nila ni Marian ug Dingdong , ingon man usab sa direktor nga si Mae Alviar Cruz, ug sa tanang naglangkob sa Rewind nga nagpakita sa pagbangon sa movie industry sa nasud.
Mag-uban forever
Gisaulog dili pa lang dugay nila ni Matteo Guidicelli ug Sarah Geronimo ang ilang wedding anniversary.
"4 years of 'WOW!' Marriage is complete with all the emotions you’ll ever imagine. Learning and living life with you is magical and unexplainable. Wisdom and maturity is gained," Instagram post ni Matteo.
Masaligon si Matteo alang sa lig-on nila nga kaminyoon hangtod sa tibouk nila nga kinabuhi.
"Looking forward to many many more years, forever.I love you. Thank you for being you,” dugang pa niya.
“I am not big bird” nataypan
Nakadawat og mga pagdayeg ang big comeback movie ni Enrique Gil nga “I Am Not Big Bird” gumikan sa hugyaw nga dagan sa istorya niini, ingon man usab ang acting performance sa aktor .
Aduna pa’y mga sinehan nationwide ang padayon pa nga nipasalida sa maong pelikula.
Ang “I Am Not Big Bird” kay gipaluyohan sa Black Sheep, Anima Studios, ug Immerse Entertainment .
Maxine Medina mabdos
Malipayong gianunsyo sa beauty queen -actress nga si Maxine Medina nga nagsabak siya alang sa labing una nga anak nila sa iyang bana nga si Timmy Llana .
Dili gyud masukod ang gibating kalipay samtang gikuptan ni Maxine ang sonogram sa iyang unang liwat.
“So, this is how it feels to hold an ultrasound photo of our own little one, yieeee… We’re thrilled to share the most precious news! We’re expecting our first little bundle of joy!” suma pa sa iyang Instagram post.
Balak Awit 2024 nagmalampuson
Nagmalampuson ang BalakAwit 2024 o "Ikatulong Hugna Sa Indigay sa Balak Ug Awit" nga gipahigayon didto sa SM Seaside City sa niaging adlaw.
Gipasiugdahan ang maong kalihokan sa Kagamhanan sa Dakbayan sa Sugbo pinaagi sa Cebu City Youth Development Commission.
Kabahin kini sa nakalinya nga mga programa sa dakbayan alang sa nagkadoul nga kasaulogan 87th Cebu City Charter Day .
Ang mga mananaog sa kategoriyang indigay sa balak mao sila si Cassandra Nicole Alcordo Adlawan sa Brgy. Kasambagan (grand winner) , John Denver Bacalso sa Brgy. Bulacao (1st runner-up) ug Jellian Gabinete Bularin sa Brgy. Babag (2nd runner-up) .
Samtang ang mga mananaog sa kategoriyang awit mao sila si Rizza Mae Gravines sa Brgy. Sawang Calero (grand winner), Queen Susane Dugaduga sa Brgy. Bulacao (1st runner-up) ug Kevin Roises Tecson sa Brgy. Basak Pardo (2nd runner-up).
Mapasalamaton ang pangulo sa CCYDC nga si Paolo Saberon sa tanang nisalmot sa maong kalihokan nga nag-ugat sa ideya ni Mayor Michael Rama.
Renz nangita og mas lawom nga awit
Nagmalaumon ang beteranong singer nga si Renz Verano nga mahibalik ang maunoron nga Original Pinoy Music (OPM) karong panahona.
“Ang gusto kong mangyari sa OPM, bumalik ‘yung mas madamdaming mga awitin,” saysay pa ni Renz ngadto sa “Fast Talk with Boy Abunda” .
Matud pa sa singer nga bisan paman sa pagsulbong sa mga awit sa bag-ong henerasyon , mangita gihapon siya og mga awit nga mas dunay hugot. “Sana bumalik lang a portion. All I’m asking is a portion ng mabibigat na awitin na mas hugot,” dugang pa niya.
- Latest