MANILA, Philippines — Hindi pa rin masanay-sanay sa pagsundot ng ilong ang Kapamilya actress na si Yam Concepcion — 'yan ay kahit nakararami na siya ng coronavirus disease (COVID-19) swab tests simula pa noong 2020.
Regular na nagkakaroon ng RT-PCR tests sa mga celebrities bago ang mga shoot, para na rin matiyak na hindi kumalat ang nakamamatay na virus sa mga set.
Pero para kay Yam, tila lumalala lang ang takot niya sa procedure habang inuulit-ulit ito.
"Eto nanaman tayo... nakailang swab [test] na ko pero parang palala ako ng palala. Pasenya na," biro ng aktres ngayong Biyernes sa kanyang Instagram post.
"May pa close up pa ah. Lol."
Halos ganyan din ang reaksyon ng aktres, na sumikat nang husto sa pagganap niya bilang kontrabida sa Kapamilya serye na "Halik," sa isang video noong ika-16 ng Disyembre, 2020.
Kitang-kita sa video ang mahigpit na hawak niya sa healthcare worker habang itinutusok ang maliit na patpat sa ilong na siyang kumukuha ng nasopharyngeal swab specimen.
"Sorry talaga!" sabay tawa ng aktres habang hamahagalpak ang mga nanunuod sa kanya.