Service, not Money

‘When you go into business, do not think of making money or else you will fail. Think of it as being there to serve by solving other people’s problem.” Mao ni lenggua sa akong guest sa among online show sa Banat News page niadtong Martes sa hapon nga si Rey Calooy. Si Calooy, presidente sa Cebu Filipino Business Club Inc., ug presidente ug founder sab sa RNC Marketing nga nanag-iya og nagkadaiyang mga negosyo. Lumad siya nga taga Libagon, Southern Leyte.

Na feature na namo iyang istorya sa kinabuhi sa Tingusbawan section sa Banat News matag Lunes mga dul-an duha na ka tuig ang nalabay. But adtong Martes pa gyud mi nagkita sa personal. Business mentor na siya. Daghan kaayo na siya’g mga gagmay’ng negosyante nga gitudloan ug gigiyahan lukop nasud. Nagsugod na siya sa wala as in pobre gyud. Nag-working student na siya pag-college niya, pinaagi sa pagpangargador sa Carbon market kaniadto. Nahimo siyang reporter sa dyLA, hangtud nga nahimong sales manager sa usa ka pharmaceutical company sulod sa lima ka tuig, ni resign ug namaligya og trapo. He said, gituyo to niya nga trapo iyang baligya aron mamatud-an niya sa iyang kaugalingon nga kaya niya nga mupaubos ug magmapaubsanon. Karon malampuson na siya nga negosyante ug business mentor. Pakpak!

Sama sa akong nahisgutan na sa nanglabay nga mga columns dinhi, tambag ni Calooy nga kun wala kay capital alang sa negosyo, mang-angkat usa gyud ka, or consignment ba. Meaning manghangyo ka nga mubaligya og produkto, unya patungan nimo og gamay ug bayran kun mahalin na. Kun dili mahalin imong i-uli ang produkto ngadto sa tag-iya. Paambit pa niya nga kaniadto sa pagpamaligya niya og trapo, nangankat ra gyud siya ug iyang identification guard maoy iyang gi garantiya. Pasabot niya nga pagpamatuod gyud kadto nga dili siya magbinuang sa tag-iya sa mga trapo ug iyang gitaya ang iyang integridad.

Suma pa ni Calooy, mahimo sab nga kun wala kay capital tan-awon nimo unsay naa sa inyong balay, sa inyong kusina nga mahimo nimong magamit aron pagmugna og produkto. Nag-una na niini ang pagbaligya og sud-an o pagkaon nga imong baligya sa imong mga silingan ug pinaagi sab sa facebook.  Ug kun duna kay capital, you start small. Tun-an gyud nimo og maayo imong negosyo. Hands on gyud ka. Unya, kinahanglan dili ka magdugay ana nga kosepto. Meaning, you keep innovating and improving your product.

Ingon sab siya nga kun magnegosyo ka, paningkamutan gyud nimo nga tigumon usa nimo imong ginansya. Paningkamutan nimo nga maka save gyud ka. Dili ka magpataka og gasto. Magdaginot ba. Save more, spend less. Ayaw pagloan or panghuwam og kwarta aron aduna kay capital. Kay niya pa, ma-alkanse gyud ka ana, di ka makabawi kay magbayad pa ka sa imong utang. Hinungdan nga kun wala kay capital, mag-consignment usa ka ug maningkamot ka nga makatigom gyud ka pinaagi sa imong ginansya. Dili magpataka og gasto. Kanang loan niya pa, angayan ra na kun business expansion na—meaning establish na imong negosyo.

Tan-aw mo sa among online show nga MARKado, dear okRYANians ,every Tuesday at 4p.m., aron makakat-on mo pinaagi sa mga malampusong negosyante nga nagsugod gyud sa wala kaniadto. I-like among facebook page: Banat News.  Have a blessed Sunday, dear okRYANians!

Kun duna mo’y reaksyon o ba kaha suggestion, ipadala kana with your name and address ngadto sa: 09225195880. Pwede sab ta mag-friend sa facebook. Pangitaa akong fb account: Rai Seller.