Rache, Mikee ug Yad misidlak; Jonas natagak

CEBU, Philippines — Nagpadayon gihapon ang laing hugna sa panagsangka sa mga mang-aawit karong tuiga sa Sinulog Idol.

Sa ikaduhang gabii sa kompetisyon, midoble na ang mga mitan-aw sa maong kompetisyon nga gipahigayon sa  Plaza Independencia.

Niadtong Sabado, gipahigayon ang Jam Night kun diin ang 12 ka contestants gi-grupo ngadto sa upat.

Ang upat ka grupo magpili og duha ka kanta. Ang usa niini mao ang slow nga awit ug upbeat song  nga makahatag og kalingawan ngadto sa kinabag-an.

Una nga mipasundayag ang grupo nila ni Vanessa Parame, Jonas Elarcosa ug James Alfafara nga gitawag "Bermuda Trio".

Giawit sa tulo ang awit nga nag-ulohan og "Way Back Into Love" gikan sa pelikula Music and Me ug "Sway" nga gipasikat ni Michael Buble.

Sunod nga mipasundayag ang grupo nila ni Jake Batiancela, Maica Papas ug Shim Dagatan kinsa mao ang gitawag niadtong gabhiuna og Triple Threat.

Gipadungog sa tulo ang ilang version sa "Say Something" gikan sa  A Great Big World. Ang upbeat song sa tulo mao ang "Tip Toe" ni Jason Derulo. Samtang sila si Jessa Abaquita, Zane Dugaduga ug Kyla Dizon mao ang mipainit sa stage sa dihang giawit nila ang sikat nga mga trio songs nga "Pagsure Oy" ni Zhalia ug "Bang Bang" ni Jessie J, Ariana Grande ug Nicki Minaj.

Sa mao nga round, midominar gyud ang performance nilang tulo ni Rache Parco, Mikee Allaga ug Yad Jayme. Gani, sila ang nahimomg Stars of the Night.

"Overwhelmed kaayo ko although naa mi mga conflicts and daghan mi nga gibuhat nga mga preparations, pero nagkasinabot gyud mi. Gi-work gyud namo tanan para makumpleto gyud mi", padayag pa Parco. Dugang pa ni Parco nga sila si Jayme ug Mikee mao ang mipili sa kanta nila nga "Heaven" ni Bryan Adams ug siya mao ang mipili sa ilang upbeat song nga "Hound Dog" nga gipasikat ni Elvis Presley.

"Dali ra namo nasabutan ang kanta kay nadungog man namo nga ni-fit siya sa among vocal range", suma pa ni Parco.

Sa pamahayag ni Allaga, matud pa niya nga dili ra lisod ang makipagkolaborasyon nila ni Jayme ug Parco gumikan kay bisan dili sila sama og timpla sa mga kanta apan gipaninguhaan nila nga makahimo og koneksyon aron nga makalahutay sa maong round sa kompetisyon.

Sa komento nga gibuhian sa Pinoy Dream Academy scholar ug resident judge Apple Abarquez, matud pa niya nga patas ug balanse ang gipakita nga performance sa tulo.

"Very nice. Rache, Yad and Mikee. It is a night for you. Your slow song impressed me a lot and this one [upbeat song] entertained me a lot. Good job!", suma pa ni Abarquez.

Gawas sa kadaugan sa tulo, nanamilit na sa maong kompetisyon ang garbo sa Daanbantayan nga si Jonas Elarcosa. Si Jonas ang labing una nga natangtang sa kompetisyon.

Daan na nga nasulod sa Bottom 3 si Elarcosa sukad pa sa unang gabii pa lang sa kompetisyon.

"You lift your voice, but we cannot seem to hear it and it floats with the wind", pulong pa ni Abarquez ngadto kang Elarcosa. Nakabati og kadismaya si Elarcosa apan pabilin gihapon siya nga mapasalamaton gumikan kay nahimo siya nga parte sa karon nga edisyon.

"The experience is dili makabayran og kwarta kay nakakita ko og family. Pirmi man ni nila isulti nga Sinulog Idol is family. Na-feel nako nga apil kos pamilya. Infact daghan kaayo sa akong mga kauban ang naghilak after I got eliminated,” suma pa niya.

Mapasalamaton sab si Elarcosa sa tanan nga misuporta kaniya sukad pa sa unang adlaw hangtud karon sa iyang pagpanikaysikay sa Sinulog Idol.  "Naa koy nakita nga nagpa-tarp pa sila, nag-effort gyud sila and it was very much appreciated. I hope nga bisag nga gawas nako sa competition kay naa gihapon sila nga mo-support nako", pagtapos ni Elarcosa.