Hugyaw nga mga teleserye sa 2018

CEBU, Philippines — Ang Pilipinas nailhan tibuok Asya nga adunay hugyaw nga mga teleserye. Gani, ubay-ubay sa mga teleserye sa nasud kay gipasalida na sa nagkalain-laing dapit sa Asya, una niini mao ang Pangako Sayo nilang Jericho Rosales ug Kristine Hermosa niadtong 2000.

Hangtod karon, wala’y paghupas ang hilig sa mga pinoy sa teleserye bisan pa man sa pagsulbong sa social media ug sa mga bag-ong teknolohiya. Kasagaran kanato mopahungaw sa atong gibati ug mopagawas sa atong opinyon kalabot sa atong gisunod  nga mga serye pinaagi sa social media.

Pipila sa fans mopahigayon og Twitter party samtang nagtan-aw sa teleserye sa ilang paboritong love team. Dili sab mawala ang mga memes ug bloopers gikan sa mga eksena sa teleserye. Tungod niini, maisip nato nga usa ka mabulokong tuig ang 2018 alang sa Philippine television  tungod sa mga teleseryeng nimugna og grabeng kasikas sa online world.

Karon atong hisgotan ang pipila ka mga teleserye nga nitaktak gyud sa huna-huna sa mga Pinoy  viewers sa  2018.

FPJ’s Ang Probinsyano - Nag-una kini sa mga teleserye nga kinaham tan-awon sa mga Pinoy viewers. Tulo ka tuig na kining gipasalida sa ABS-CBN ug gipatumba na niini ang  lima ka mga kaatbang nga teleserye sa GMA-7. Ang Primetime King Coco Martin maoy bida sa maong action series kinsa nailhan sa karakter nga SPO2 Ricardo “Cardo” Dalisay. Daghang celebrities ang nahimong guest cast sa maong serye ug uban niini kay nabanhaw ilang karera tungod sa maong programa. Pipila sa mga beteranong co-stars ni Coco sa maong serye mao silang Edu Manzano, Jaime Fabregas, Angel Aquino, John Arcilla, Lito Lapid ug ang numero unong kontrabida sa kinabuhi ni Cardo  nga si Eddie Garcia. Bisan sa mga isyu nga gibato batok sa programa, padayon kining gisundan sa mga manan-away ug wala pa natino kung kanus-a kini matapos.

Halik - Ang teleserye sa ABS-CBN nga kanunay’ng trending sa social media tungod sa mga init ug kulbahinam nga mga eksena niini. Gibidahan kini nilang Jericho Rosales, Yam Concepcion, Yen Santos ug Sam Milby nga nagsentro sa “infidelity” o pagpangabit. Nagbaha sa online world ang panamastamas sa mga netizens ngadto sa karakter ni Jade (Yam), kinsa nagluib  iyang bana nga si Lino (Jericho) ug nakigrelasyon ngadto sa adunahang lalaki nga si Ace (Sam) nga minyo ngadto ni Jacky (Yen). Daghan ang nag-trending nga eksena sa maong serye ug usa na niini mao ang pagkasakop ni Lino nga naghalok ang iyang asawa nga si Jade ug kabit niining si Ace sulod sa usa ka imnanan. Tungod sa init nga suporta sa maong teleserye, extended kini hangtod karong Marso 2019.

Bagani -  Ang pantaserye sa ABS-CBN nga nag-una sa listahan sa “Most Tweeted Teleserye in the Philippines” base sa datos sa Twitter. Ang maong Filipino Mythology-inspired nga teleserye kay gibidahan nilang Liza Soberano(Ganda) ug Enrique Gil (Lakas). Lakip sa mga nag-trending nga eksena niini mao ang “Mekeni Mekeni tugtog do-re-mi” dance chant ni Dimples Romana kinsa nagdala sa karakter nga Babaylan. Nag-trending sab sa Twitter ang final episode niini nga nipakita og dakong twist sa karakter nilang Liza ug Enrique. Tungod niini, daghan sa mga loyal viewers ang nihangyo og sequel sa maong pantaserye.

Wildflower - Ang teleserye nga kanunay’ng trending sa social media nga gihatagan og kinabuhi ni Maja Salvador, Joseph Marco, RK Bagatsing, Aiko Melendez ug Tirso Cruz III. Ginadayeg si Maja sa iyang hugyaw nga performance sa maong serye diin nailhan siya isip Ivy Aguas ug Lily Cruz. Nagtuyok ang estorya kabahin sa pagpanimalos ni Lily ngadto sa mga Ardiente. Pipila sa dili makalimtan niining episode mao ang “Wildest Wedding of the Year” nilang Lily ug Arnaldo (RK Bagatsing), pagpatay ni Diego(Joseph Marco) ug ang torture scene ni Lily didto sa plaza sa Ardiente nga gipasalidang black and white tungod sa madugo nga eksena nga dili haom sa batang viewers. Ang seryeng nipasikat sa linyang “huwag ako!” kay natapos usa ka tuig gikan sa pagsalida niini sa ere.

Victor Magtanggol - Gibidahan kini ni Alden Richards ug dili si Maine Mendoza ang ka-love team niya niini. Gidala ni Alden ang karakter ni Victor Magtanggol, usa ka superhero. Daghan ang nasuko sa AlDub fans nganong wala gipares si Alden ngadto ni Maine ug gipares hinuon ngadto nilang Janine Gutierrez ug Andrea Torres. Apan bisan pa man sa mga intriga, kanunay gihapong mag-trending ang mga eksena sa maong pantaserye ug nilungtad  kini og 16 ka semana sa telebisyon.

Playhouse - Nipakilig sa mga Pinoy viewers ang daytime series sa ABS-CBN nga Playhouse nga gibidahan nilang Angelica Panganiban ug Zanjoe Marudo. Naghisgot kini sa kinabuhi sa magtiayong  Patty (Angelica) ug Marlon (Zanjoe) kinsa nakasinati og pagsulay sa ilang kaminyoon. Dinhi sab unang nilugwa ang DonKiss love team nilang Kisses Delavin ug Donny Pangilinan kinsa nilandig sa ikatulong pwesto sa listahan sa  Most Tweeted about Love Team sa Pilipinas sa 2018. Ang Playhouse ra sab ang nag-inusarang daytime series nga nalakip sa Most-tweeted teleserye  sa 2018.

Kambal, Karibal - Usa sa malamposong teleserye sa GMA-7 nga gibidahan nilang Bianca Umali, Miguel Tanfelix, Pauline Mendoza ug Kyline Alcantara. Nipakita kini sa panagsungi nilang Crisan (Bianca) ug Crisel (Pauline). Gilangaw kini sa bag-o pa apan kalit nga nitaas ang rating sa  pagtungtong sa 2018 hinungdan nga kapila kini na-extend sa ere. Nag-viral ang CPR scene sa maong serye ug nahimong blooper sa social media tungod sa sayop nga pagkabuhat sa nahisgutang eksena ug niresulta sa pagbinayloay og halang nga mga pulong nilang GMA-7 creative manager Suzette Doctolero ug ABS-CBN TV host Ogie Diaz sa online world.

La Luna Sangre - Laing pantaserye sa ABS-CBN nga gihangop sa mga Pinoy viewers nga gibidahan nilang Kathryn Bernardo, Daniel Padilla, Angel Locsin ug Richard Gutierrez. Mao kini ang ikatulong installment sa teleseryeng Lobo nga gibidahan nilang Angel Locsin ug Piolo Pascual kaniadto.  Si Malia (Kathryn) ug Tristan (Daniel) naningkamot nga makab-ot ang kalinaw tali sa duha ka magkaaway nga grupo, ang mga lobo ug mga bampira. Nasayran nga pirme silang mag-apas sa taping sa maong pelikula. Nagsugod ang maong serye niadtong Hunyo 19, 2017 ug natapos niadtong March 2, 2018.

Contessa - Solid sab kaayo ang suporta sa fans sa Kapuso actress Glaiza de Castro sa teleserye niining Contessa nga nihulip sa popular afternoon drama series sa GMA-7  nga Ika-6 Na Utos. Ang maong serye nalakip sab sa top 10 most-tweeted teleserye sa Pilipinas sa 2018.

PamiLya Roces - Family story nga duna’y nagpahipi nga leksyon nga mahimong panaminan sa kadaghanan. Usa lang kini sa mga butang nga nagtangag sa serye sa GMA-7 nga Pamilya Roces.  Gibitoonan kini nila ni Roi Vinzon, Gloria Diaz, Snooky Serna, Gabbi Garcia, Carla Abellana, Sophie Albert, ug Rocco Nacino.

Sherlock, Jr. - Laing serye nga giluto sa GMA-7 para iatbang ngadto sa lig-on nga kaatbang niini nga teleserye sa ABS-CBN nga Ang Probinsiyano. Gibidahan kini nilang Gabbi Garcia ug Ruru Madrid. Nag-trending sa social media ang pagkamatay sa karakter ni Gabbi nga si Lily.

The Blood Sisters - Laing teleserye sa Pilipinas nga nipakita og talagsaon nga talento sa bida niining si Erich Gonzales diin gidala niya ang tulo ka mga karakter nga sila si  Erika, Carrie ug Agatha. Kalabot kini  sa  nagkabuwag-buwag  nga magsuon. Lakip sa mga leading men ni Erich mao silang Enchong Dee ug Ejay Falcon.