Naka 100M na!

CEBU, Philippines — Nihipos na matud pa og P100 million ang pelikula nga “Miss Granny” starring Sarah Geronimo. Kini maoy malipayong gipahibawo sa Viva Films. Suma pa sa maong movie outfit, nagkakusog ang maong pelikula nga gipasalida karon sa 160 ka mga sinehan lukop nasud.

Dili Padded

Giklaro ni direk Cathy Garcia-Molina nga dili matud pa padded o wala nila gipaburot ang box-office result sa pelikula nga The Hows of Us nga gibituonan nila ni Kathryne Bernardo ug Daniel Padilla. May nikwestiyon man nganong dili matud pa tibuok ang giluwatan nila nga kantidad nga mao matud pay gross sales sa unang adlaw nga pagpasalida niini. Suma pa ni direk Cathy, dili tibuok kay dili man gyud matud pa tibuok sab ang presyo sa ticket. Kon gi-round up niya pa, mao ni timailhan nga gipaburot ang kita o gipadak-an sukwahi sa tinuod gyud.  Kahinumduman nga nikita ang maong pelikula matud pa og P35, 938, 622.74 million sa unang adlaw niini sa mga sinehan.

Mura’g makauyab na

Hayan mausab na ang status ni Ritz Azul nga No Boyfriend Since Birth o NBSB, sa dili madugay. Kini kay gibutyag ni Ritz atol sa presscon sa iyang umaabot nga pelikula—kauban si Pepe Herrera nga nag-ulohan og “The Hopeful Romantic” sa Regal Films—aduna na siyay ka date karon nga non-showbiz guy. Barkada matud pa sila busa dili niya maihap pila niini ang romantic date.

Naghimo’g kanta

Suma pa ni Nadine Lustre nga haom kaayo ang panahon nga wala siya’y TV project karon sanglit makapukos siya sa pagsuwat og kanta alang sa umaabot niya nga album. Suma pa niya nga gitabangan matud pa siya sa iyang hinigugma nga si James Reid sa paghimo og kanta. Gawas sa album, gihimo usab niya karon ang pelikula nga “Ulan” ug busy siya sa pagplano alang sa iyang endorsement para sa usa ka international brand sa sapatos isip brand ambassadress.

Idol si Julia

Naghandum gihapon si Michelle Vito nga makabaton og ka-loveteam sanglit 20-anyos pa lamang siya. Pero kon dili man gani kini mahitabo, nanghinaot siya nga mahisama ang iyang career kang Julia Montes nga matud pa, bisa’g walay loveteam, malampuson gihapon. Niya pa, ganahan siya sa estado ni Julia nga bisa’g walay love interest aduna gihapoy teleserye.