Manila, Philippines ---- Karong semanaha na ang storycon para sa comedy show nga himuon ni Marian Rivera sa GMA-7, pero dili matud pa kini ihulip sa nahuman na nga Pepito Manaloto sama sa unang nabalita. Lahi matud pa nga time slot ang butangan niini. Wala pa puy kumpirmasyon kun lakip ba gyud sa cast si Barbie Forteza ug hulipan ba gyud ni Roderick Paulate si John “Sweet” Lapus. Murag dili na kaya ni Sweet sanglit apil man siya sa action-drama series nga Makapiling Kang Muli (kanhi Rancho Paradiso). Samtang gipaabot na sa mga fans nila ni Marian ug Dingdong Dantes ang love scene nila para sa My Beloved nga didto pa gimugna ni direk Dom Zapata sa resort, diin sila nag-taping para sa Marimar kaniadto. Tsika pa ni Marian, daghan siya og nahinumduman sa ilang pagbalik sa resort. Gumikan sa love scene nila sa My Beloved, angayan lang nga ibalhin siya og mas late nga time slot. Daghan pa og gustong buhaton si direk Dom sa soap busa angay gayud matud pa kining atangan sa umaabot nga mga episodes.
Nganong nag-sorry si Edgar?
Mao diay nga nag-sorry si Edgar Allan Guzman pagdawat niya sa iyang trophy sa iyang nadaog nga Breakthrough Performance by an Actor sa 9th Golden Screen Awards gumikan kay one month na silang wala mag-istorya sa iyang manager nga si Noel Ferrer. Sa Teatrino lamang sila subling nagkita ug nagka istorya. Nakadayeg pa ra ba mi sa acceptance speech ni Edgar, diin giangkon niya ang iyang mga kasaypanan ug misaad nga magtinarong na gyud karong tuiga. Lakip na kaha niini ang iyang pagbalik na sa iyang pamilya sanglit gikatahong nanghipos naman siya sa iyang mga gamit gikan sa giistaran nila sa iyang GF nga si Jolan Velus? Pero nag-tweet si Jolan ug matud niini, may blessings sa ilang masig ka pamilya ang ilang panagtipon ni Edgar. Kataw-anan matud pa ang mga isyu, “they don’t know the whole story,” tweet pa niini.
Julie Anne San Jose nasayup
Gipahibaw ni Julie San Jose sa Showbiz Central nga May 4, ang showing sa Just One Summer, ang launching movie nila ni Elmo Magalona sa GMA Films. Apan natunong og Biyernes ang petsa nga giingon ni Julie Ann ug walay local movie nga mubukas og Friday. Hayan May 9, ang gipasabot niini nga grand opening sa movie nga ubos sa direction ni Mac Alejandre ug gipaabot na sa daghang mga fans nila ni Julie ug Elmo. Gitinuod pud ni Julie Anne ang giingon niya sa usa ka interview nga musugot siya kun ugaling may kissing scene sila sa iyang ka-love team sanglit apil kini sa iyang trabaho. May hawkanay gyud sila ug miabot sila og take seven nga daling gipasabot ni Julie nga una niya matud pa kadto niya nga kiss ug karon pa siya nakahimo og pelikula busa nakuyawan siya.