Miss Universe 2010 Jimena Navarrete

CEBU, Philippines - Nasayran nga 15 anyos pa lamang si Navarrete nagsugod isip model. Mikuha siya og kursong Nutrition Science. Siya ang ikaduhang Miss Universe winner gikan sa Mexico. Ang ilang unang Miss Universe crown naangkon ni Lupita Jones, niadtong 1991, kinsa mao karon ang naggunit sa Miss Universe franchise sa ilang nasud. Daw sulagma, pero si Jones ug Navarrete managsama nga sa Las Vegas midaog ug nakoronahan isip Miss Universe winners.

Suma pa sa international media, daghan ang nakugang sa resulta sanglit dako ang pagtuo sa kadaghanan nga maggikan sa Ireland, Venezuela, o USA ang mananaog. Pero mas daghan ang nakugang tungod kay wala gyud gani masulod isip semi-finalists ang mga pambato sa USA ug Venezuela.

Ang winning question ni Navarrete naggikan kang Olympic gold medalist skater Evan Lysacek, kabahin sa unsay buhaton sa problema kalabot sa paggamit sa mga kabataan sa Internet nga walay tukmang giya.

Pinaagi sa usa ka interpreter mitubag si Navarrete nga, “I do believe that the Internet is an indispensable, necessary tool for the present time. We must be sure to teach them the values that we learned as a family.”