Album sa Fervent ilunsad na!

Mapasigarbohon kaayong modalit ang bandang Fervent sa ilang umaabot nga album launching. Ang mga astig nga membro niining bandaha mao silang Joyous Bendoy (vox/guitarist), Abet (guitarist), Aiko Abelardo (bassist) ug si Joharni Bendoy (drums).

Dugay nang gipaabot sa masang bisrockista ang makapanindog-balahibong mga komposisyon sa bandang Fervent, ug kay sama sa ubang mga banda, nagkaguliyang pud sila og pangitag paagi unsaon sa pagtuman niini nga makab-ot nila ang dugay nasad nilang gipangandoy nga pagsabwag sa ilang mga kinasingkasing nga hinagoan.

Karon Enero 26, 2008 Sabado, diha sa Mandaue Sports Complex, alas siete sa gabii, mahitabo na ug masaksihan na gayud nato ang paglunsad sa ilang indie album. Aduna kini 13 ka tracks inubanan sa carrier single nga Dili Molubad, May Paglaum Pa ug MnM. Ang maong cd nagkantidad lang og 150php. Ang mga bandang kauban nilang manukar aning gabhiona mao ang Kabobo, Agipo, The Agadiers, Aggressive Audio, Assembly Language, WTF (What’s the Frequency?) ug ang Wetslipperz.

So, kitakits ta ngadto mga bisrockers, dad-a tanang higala ug mag sadya kita sa pag jam sa taman… Entrance tag 30php lang ug ang makapalit sa ilang album nga specially marked CDs adunay kahigayonan nga maka-apil sa ilang music video nga pagahimoon puhon. Suportaan nato sila!