Mibuto kagahapon ang balita nga si Rod Strunk naghikog didto sa California.
Si Rod mao ang bana sa kanhi komedyanteng actress nga si Nida Blanca ug suspek usab kini sa pagpatay sa actress niadtong Nobiyembre 2001.
Matud ni Manay Lolit Solis, ang beteranang magsusulat sa Pang Masa, nga super-deny gyud kaayo si Rod nga duna siya’y kalabutan sa kamatayon sa iyang asawa bisan og ang National Bureau of Investigation (NBI) dunay nahipos nga mga ebidensiya batok kaniya.
Sukad sa pagbalik ni Rod ngadto sa Amerika wala nay balita kabahin niya apan kalit lang mibuto ang balita kagahapon nga naghikog kini.
Kuwang pa ang mga nahipos nga impormasyon kabahin sa giingong pagpakamatay ni Rod, apan matud ni Manay Lolit nga kung tinuod nga dunay kalabutan si Rod sa kamatayon sa iyang asawa posibleng gipaningil na kini sa iyang konsensiya.
Gihuwat karon sa mga tawo ang tubag ni Kaye Torres kabahin sa nahitabo sa iyang ama-ama.
Si Kaye giingong dunay pagtuo nga adunay kalabutan sa pagkamatay sa iyang inahan si Rod.
Ug matud pa usab ni Manay nga kung inosente si Rod nganong wala naman kini mobalik pa dinhi sa Pilipinas?