CAVITE, Philippines — Nasa mahigit P300,000 pera at mga cellphone ang natangay ng ‘di bababa sa tatlong armadong holdaper makaraang pasukin at holdapin ang isang warehouse kamakalawa sa kahabaan ng Aguinaldo Highway sa Imus City.
Sa ulat ng pulisya, alas-12:30 ng madaling araw nang pasukin ng mga armadong kalalakihan ang warehouse ng Optimize Customer Solutions Inc. na matatagpuan sa Brgy. Anabu 1, ng nasabing lungsod.
Pagpasok ng mga suspek sa nasabing bodega ay dinisarmahan agad nila ang dalawang naka-duty na security guards na sina alyas “Allan” at alyas “Cesar”.
Mabilis na kinuha ng mga suspek sa dalawang guwardya ang kanilang shotgun at cal. 38 revolver.
Kasunod nito, nilimas ng mga suspek ang laman ng kaha at kinuha ang cash money na aabot sa halagang P115,000.00 at ang 22 units ng mga android cellphones na may halagang P183,200 bago mabilis na nagsitakas.