Magkakaibigan naglaro sa tabing ilog: Grade 9 nalunod

MILAOR, Camarines , Philippines — Kamatayan ang sinapit ng isang Grade 9 student na dalagita sa kanilang paglalaro ng mga kaibigan matapos malunod sa ilog ng Zone-2, Brgy. San Miguel, Milaor, Camarines Sur kamakalawa ng tanghali.

Ilang oras bago nakuha sa may kawayanan ng naturang ilog ang bangkay ng biktima na kinilalang si Mari Bo, 14-anyos at residente ng naturang lugar.

Sa ulat, pasado alas-12 ng tanghali matapos makapananghalian kasama ang dalawang kalaro ay kumuha ng mangga ang biktima at nagyaya para maglaro sa tabi ng ilog sa kanilang barangay.

Gayunman, ilang sandali ay lumusong ang dalagita sa ilog para lumangoy pero hindi na ito muling nakita. Nabahala ang mga kasama kaya humingi sila ng saklolo.

Ilang oras bago natagpuan ang bangkay ng dalagita na sumabit sa kawayanan malapit sa lugar kung saan siya lumubog.