SUV pinagbabaril: 2 sakay sugatan

COTABATO CITY, Philippines — Dalawang Moro ang sugatan sa isang ambush nitong Biyernes ng gabi sa Barangay Rosary Heights 5, dito sa lungsod na nagdulot ng takot sa mga pamilyang naninirahan sa paligid.

Sa ulat nitong Sabado ni Cotabato City police director Col. Querubin Manalang Jr. sakay ng isang Toyota Fortuner sina Misuari Tatak at si Datu Akbar Maulana nang paputukan ng mga armadong lalaking nakapuwesto sa gilid ng 5th Road sa Barangay Rosary Heights 5.

Nagtamo ng mga tama ng bala sina Tatak at Maulana sanhi ng naturang pananambang, na agad namang naisugod sa pagamutan ng mga miyembro ng Cotabato City Police Precinct 2  upang malapatan ng agarang lunas.

Ayon kay Manalang, nakilala ng mga saksi ang mga nag-ambush kina Tatak at Maulana na ngayon ay tinutugis na ng mga operatiba ng Cotabato City Police Office.