Cellphone store hinoldap, gadgets at pera nilimas
CAVITE , Philippines — Isang cellphone store ang inatake at hinoldap ng apat na armadong lalaking lulan ng dalawang motosiklo at tinangay ang kinitang pera at mga tinitindang gadgets kamakalawa ng tanghali sa Brgy. Mabuhay, Carmona City Cavite.
Sa imbestigasyon ng Carmona Police, dakong alas-12:09 ng tanghali nang pasukin at holdapin ng apat na suspek ang PIA’s Gadgets Store sa B14 L7, Cityland Subdivision, Gate 1, Brgy. Mabuhay Carmona City na pagmamay-ari ng negosyanteng si Gene Irish Dela Torre, residente rin ng nasabing lugar.
Base sa kuha ng CCTV ng nasabing store, sabay-sabay na pumasok ang apat na suspek at agad na naglabas mg mga baril at nagdeklara ng holdap.
Isa sa mga suspek ang lumapit sa cashier booth at tinangay ang mga pera at nilimas ang lahat ng iphone cellphone dito.
Matapos nito ay mabilis na nagsitakas ang mga suspek.
Sa salaysay ng biktima, magkakaangkas ang mga suspek sa isang MIO motocycle at isa pang itim na motorsiklo nang biglang dumating sa store. Sila ay mga nakasuot ng kulay brown jacket, asul na helmet, maong pants, Como green jacket, pink helmet, red jacket, itim na pants at pink na may violet helmet ang mga suspek.
- Latest
