PNP: 2 nakauniporme ng pulis sa Koronadal holdup, tukoy na
MANILA, Philippines — Tukoy na ng Philippine National Police (PNP) ang dalawa sa anim na suspek na nanloob sa Agencia Brillantes Jewelry Pawnshop noong nakaraang linggo sa Osmeña Street Barangay Zone 1, Koronadal City gayundin ang kanilang pinagtataguan.
Ayon kay PNP Chief PGen. Benjamin Acorda Jr., kilala na nila ang dalawang suspek nakasuot ng PNP Athletic uniform at nanloob sa jewelry shop. Ang dalawa ay hindi mga tunay na pulis.
“May mga nakuhanan na tayo ng mga statements identifying the suspects and we have some leads. Unfortunately, hindi ko puwede sabihin ngayon that will help us better pursue leads para hindi naman maalarma,” ani Acorda.
Dahil dito, inutos ni Acorda ang inspeksiyon sa mga tindahan ng police uniforms kung saan ginamit ng mga suspek ang uniporme na para lang sa mga miyembro ng PNP upang malayang mapasok ang sanglaan.
Sinumang mahuhuling gumagamit ng police uniforms at magpapanggap na mga pulis ay kakasuhan ng usurpation of authority at illegal use of uniform and insignia sa ilalim ng Articles 177 at 179 ng Revised Penal Code (RPC).
Naglaan na ng P.5-milyong pabuya ang City Government ng Koronadal sa makapagtuturo o makapagbigay ng impormasyon sa mga suspek na nanloob sa nasabing jewelry shop.
- Latest