Army detachment grinanada: 2 sundalo at CAFGU sugatan
COTABATO CITY, Philippines — Dalawang sundalo at isang miyembro ng Citizens Armed Forces Geographical Unit (CAFGU) ang sugatan nang pasabugan ng granada ng mga miyembro ng Dawlah Islamiyah ang kanilang detachment sa Barangay Timbangan, Shariff Aguak, Maguindanao del Sur nitong gabi ng Lunes.
Sa magkahiwalay na pahayag nitong Miyerkules, kinumpirma ng Maguindanao Provincial Police Office at ng 601st Infantry Brigade ang insidente na nagsanhi ng pagkasugat nila Staff Sgt. Jester Arsulo at Sgt. Bryan Baylon, parehong mga kasapi ng 33rd Infantry Battalion, at isang miyembro ng CAFGU na si Nor Akmad.
Nagtamo ng mga shrapnel wounds sa iba’t ibang parte ng kanilang katawan ang tatlo na ngayon ay kapwa ginagamot sa isang ospital.
Ayon sa mga local officials, kagagawan ng Dawlah Islamiyah ang pagpapasabog ng granada sa Army detachment sa gilid ng highway sa Brgy. Timbangan upang kunwari ay ipakita sa publiko na malakas pa rin ang naturang grupo sa kabila ng pagsuko ng 287 nilang miyembro mula sa iba’t ibang bayan sa Maguindanao del Sur sa 6th Infantry Division ng nakalipas na taon.
- Latest
