MANILA, Philippines — Tinupok ng apoy ang isang supermarket sa Antipolo City, Rizal kahapon ng madaling araw, na nagresulta sa pagkaabo ng tinatayang aabot sa mahigit sa P35 milyong halaga ng mga ari-arian at paninda.
Ayon kay Antipolo City fire marshal Gilbert Valdez, dakong alas-4:00 ng madaling araw nang magsimulang sumiklab ang sunog sa ikalawang palapag ng Puregold Supermarket, na matatagpuan sa Circumferential Road, Brgy. San Jose, Antipolo City.
Sa ikalawang palapag umano matatagpuan ang opisina ng pamilihan at walang tao sa loob ng mangyari ang sunog.
Mabilis aniyang kumalat ang apoy sa ibang parte ng gusali hanggang umabot ito sa display area kung saan nakalagay ang mga ibinebentang produkto.
Mabilis namang rumesponde ang mga pamatay sunog na umabot pa ng ikaapat na alarma bago tuluyang naapula matapos ang ilang oras.