Bomber ng NPA nalambat

NORTH COTABATO, Philippines — Nasakote ng Magpet Police ang isang miyembro ng New People’s Army (NPA) na itinuturong sangkot sa roadside bombing na ikinasawi ng isang pulis sa Purok Kabisig, Brgy. Poblacion, Magpet Cotabato kamakalawa ng umaga.

Kinilala ang naaresto na si Jhonel Amada Navales alyas ”Jun Navales”, 40-anyos, magsasaka na kabilang sa Guerilla Front 53 ng NPA at residente ng Purok 2, Barangay Inac, Magpet.

Nadakip ang suspek sa tulong ng mga impormante sa lugar at sa inilatag na ­operasyon dakong alas-6:30 ng umaga.

Si Navales ay nahaharap sa kasong 11 counts of attempted murder base sa ipinalabas na warrant of arrest ng korte laban sa kanya.

Matatandaang sa naturang roadside bombing ay isa ang patay na kinilalang si PO1 Christopher Anadon at ikinasugat naman ng iba pang kasama nito na mga miyembro ng Cotabato Police Mobile Force Company ng CPPO.